दमन राई
खोटाङ। पुष्पलाल मध्यपहाडी लोकमार्ग अन्तर्गत खोटाङको चखेवाभञ्ज्याङ–सेखुवा सडक (१० किलोमिटर) खण्ड कालोपत्रे योजनाको ठेक्का तोड्ने तयारी गरिएको छ । निर्माण कम्पनी भारत कन्स्ट्रक्सन/मैनाचुली/सिद्दिसाई जेभी, काठमाडाैंको ढिलासुस्तीका कारण अलपत्र पारेको सडक कालोपत्रेको ठेक्का तोड्ने प्रकृया थालिएको हो ।
ठेकेदारले कालोपत्रेको काम पूरा गर्ने छाँट नदेखाएका कारण ठेक्का तोड्नका लागि गत १८ मंसिरमा सडक विभाग समक्ष सिफारिस गरिएको पुष्पलाल (मध्यपहाडी) राजमार्ग योजनाको कार्यालय, धुलिखेलका प्रमुख सिनियर डिभिजन इन्जिनियर दिपेन्द्र पाण्डेयले बताए ।
सम्झौताअनुसार कालोपत्रेको प्रगति नभएपछि २२ कार्तिकमा ‘ठेक्का किन नतोड्ने ?’ भनेर दोश्रोपल्ट सूचना निकालेको कार्यालयले सार्वजनिक खरिद सम्झौता, सार्वजनिक खरिद ऐन ०६३ तथा नियमावली ०६४ बमोजिम ठेक्का तोड्न सिफारिस गरेको हो ।
ठेकेदारले सम्झौता बमोजिम तोकिएको समयमा काम सम्पन्न नगरेपछि पटक पटक मौखिक तथा लिखित निर्देशनदेखि सूचना प्रकाशन गर्दा समेत कार्य सम्पन्न गर्नेतर्फ कुनै चासो नदेखाएको/प्रयास नगरेको तथा कुनै ठोस कार्य गरेको नदेखिएकाले ठेक्का सम्झौता तोड्ने प्रकृया थालिएको सिनियर डिभिजन इन्जिनियर पाण्डेय बताउँछन् । कालोपत्रेको काम करिब ३४ प्रतिशत भएपछि ठेक्का सम्झौता रद्द गर्ने प्रकृयामा लगिएको हो । कालोपत्रेको काममा चरम ढिलासुस्ती भएपछि पुष्पलाल (मध्यपहाडी) राजमार्ग योजनाको कार्यालयले १९ मंसिर ०७७ को पनि ‘ठेक्का किन नतोड्नेबसम्बन्धी अत्यान्त जरुरी सूचना’ प्रकाशन गरेको थियो ।
भारत कन्स्ट्रक्सन/मैनाचुली/सिद्दिसाईले ३० फागुन ०७५ सम्ममा सम्पन्न गर्ने गरी २ चैत ०७२ मा चखेवाभञ्ज्याङ–सेखुवा खण्ड कालोपत्रेको सम्झौता गरेको थियो । तर सम्झौताअनुसार काम नगरेपछि थप भएको पहिलो म्याद १३ पुस ०७७ मा, दोश्रो म्याद १३ असार ०७८ मा र तेश्रोपल्ट थप भएको म्याद ३० फागुन ०७८ मै गुज्रिसकेको छ । भोजपुर–दिक्तेल सडक खण्ड अपग्रेडिङ गर्ने कार्यक्रमअन्तर्गत डबल लेनमा चौडा गर्ने, पुल पुलेसा, स्ट्रक्चर निर्माण गर्ने तथा सब–बेस, बेससहित डिबिएसटी सर्फेस सतहसहित सडक स्तरोन्नति गर्ने गरी भारत कन्स्ट्रक्सन/मैनाचुली/सिद्दिसाईले चेनेज ठेक्का लिएको थियो ।
चखेवाभञ्ज्याङ–सेखुवा सडक कालोपत्रेको काम सकिएपछि भोजपुरदेखि खोटाङ हुँदै काठमाडाैं आवत–जावत गर्न स्थायीरुपमा छोटो र सहज बाटो खुल्ने छ । मध्यपहाडीको भोजपुरभित्र पर्ने सबै खण्ड तथा खोटाङभित्र पर्ने अन्य सडक खण्ड कालोपत्रे भइसक्दा चखेवाभञ्ज्याङदेखि सेखुवासम्मको सडक हालसम्म कालोपत्रे हुन सकेको छैन ।
खोटाङभित्रको जयराम–हलेसी, हलेसी–दिक्तेल र दिक्तेल–सेखुवासम्मको खण्ड कालोपत्रे भइसकेको छ । अलपत्र परेको चखेवाभञ्ज्याङ–सेखुवा सडक खोटाङ र भोजपुरभित्र पर्ने मध्यपहाडीको कालो धब्बा झैं बन्न पुगेको छ । यस्तै, दिक्तेल–चखेवाभञ्ज्याङ सडक खण्डको पंखु खोला, मेवा खोला र छेपे खोलामा पुल बन्नै बाँकी छ ।
