काठमाडौं। सडक निर्माणको काम अलपत्र पार्ने तीन वटा निर्माण कम्पनीसँगको ठेक्का तोडिने भएको छ। पूर्वाधार विकास कार्यालय पर्वतले आइतबार एक सूचना जारी गर्दै सडक निर्माणको काम अलपत्र पार्ने ३ वटा निर्माण व्यवसायीसँग ठेक्का तोड्ने प्रक्रिया अगाडि बढाएको हो।
पटकपटक म्याद थप गर्दा पनि समयमा काम नगरेपछि शिभालय निर्माण सेवा, गजुरमुखी निर्माण सेवा र हिमडङ एण्ड ठोकर कन्स्ट्रक्सनसँगको ठेक्का तोड्न लागेको कार्यालयले जनाएको छ।
यी निर्माण कम्पनीले मिलनचोक–सल्यान–धारापनी–ठोट्नेरी सडक, लमयाखोला–सुरङ्दी सडक, चानखोला–भवानी सडक, डिमुवा रम्जा–चित्रे सडक र बिरौटा–खलडाडातातोपानी सडक निर्माणको काम अलपत्र पारेका छन्।
सडक डिभिजन कार्यालय वागलुङसँग सम्झौता भएको योजनाको निर्माण कार्य सम्पन्न गर्न पटक पटक म्याद थप भएको थियो। साथै कार्यलयले लिखित, मौखिक तथा फोन सम्पर्क गर्दा निर्माण कम्पनीबाट कुनै प्रतिक्रिया प्राप्त नभएको कार्यलयले जनाएको छ।
कार्य प्रगति सन्तोषजनक नभएको प्रति कार्यालयको गम्भिर ध्यानाकर्षण भएकोले ठेक्का तोड्नु परेको सूचनामा उल्लेख गरिएको छ।
कार्यलयले ठेक्का सम्झौताको शर्त बमोजिम कार्य सम्पादन नभएको भन्दै जमानत रकम तथा अग्रिम बैंक जमानत रकम जफत गरी सार्वजनिक खरिद ऐन र खरिद नियमावली बमोजिम ठेक्का खारेज गरी कालोसूचीमा राख्ने जनाएको छ। यस सम्बन्धी कारवाही अगाडि किन नबढाउने भनेर स्पष्टिकरण पेस गर्न निर्माण व्यवसायीलाई १० दिनको समय दिइएको छ।
स्पष्टिकरण तोकिएको समयभित्र प्राप्त नभएमा वा चित्तबुझ्दो नभएमा तथा १५ दिनभित्र निर्माण कार्य शुरु नगरेमा जमानत वापतको रकम जफत गरी ऐन नियम अनुसार ठेक्का अन्त्य गरी कालोसूचीमा राख्ने चेतावनी दिइएको छ।
