काठमाण्डौं। म्याग्दीको अन्नपूर्ण गाउँपालिकामा निर्माणाधीन १४ मेगावाट क्षमताको घारखोला जलविद्युत् आयोजनामा स्थानीयवासीले काम रोकेर अवरोध गरेका छन्। वडा नं ६ घारको प्रभावित क्षेत्रमा पर्ने सडक स्तरोन्नति नगरेको र क्षति पुगेका जग्गाधनीलाई मुआब्जा दिन आयोजनाले आनाकानी गरेको भन्दै स्थानीयवासीले बुधबारदेखि आयोजनाको सम्पूर्ण काम ठप्प पारेका हुन्।
सङ्घर्ष समितिका संयोजक राजु बरुवालका अनुसार स्थानीयवासीका मागमा आयोजनाले बेवास्ता गरेको र पटक–पटकको ताकेतालाई समेत सम्बोधन नगरेपछि आन्दोलनमै उत्रिएर आयोजनाको सबै काम ठप्प पार्नुपरेको हो। बरुवालको नेतृत्वमा आयोजनाको निर्माण कार्य भइरहेको क्षेत्रमा पुगेका दुई दर्जन स्थानीयवासीले सुरुङमार्गमा बार लगाइ दिएका छन्।
त्यसैगरी आयोजनाको स्टोर, क्रसर, सवारी मर्मतस्थललगायत सबै ठाउँको काम ठप्प पारेका छन्। म्याग्दी हाइड्रोपावर कम्पनी प्रवद्र्धक रहेको यस आयोजनामा सुरुङ ब्रेकथु्र भएर अन्य ड्याम साइट र विद्युतगृहतर्फको काम अघि बढेको थियो।
आयोजनाको आन्तरिक पहुँचमार्ग बिरौटाबाट कुरिलाबौरसम्म पर्ने करिब तीन किलोमिटर सडक स्तरोन्नति र यस मार्गका कारण क्षति भएकाको लागि क्षतिपूर्ति तथा मौखिकरुपमा गरिएका सम्झौता आयोजनाले कार्यान्वयन नगरेकाले दबाबमूलक आन्दोलनमा उत्रिनु परेको स्थानीय बताउछन्।
स्थानीयवासीले आन्तरिक पहुँचमार्गलाई ग्याबिन जाली लगाएर मेसिनरी पर्खाल लगाउने, नाली निर्माणसहित दुई लेनको बनाउनुपर्ने र आवश्यकताअनुसार, सोलिङ र ढलानसँगै कालोपत्र गर्नुपर्ने माग गरेका छन्।
अन्नपूर्ण–५ शिख र ६ घारको सीमा क्षेत्रमा पर्ने कुरीलाबगरमा बाँध रहने यस आयोजनामा सुरुङमार्गबाट पानी लगेर पोखरेबगरमा रहने विद्युतगृहमा खसालेर विद्युत उत्पादन गर्ने तयारी छ। कूल दुई अर्ब ४२ करोड लागत अनुमान गरिएको यस आयोजनामा कोरोनाका कारण निर्माणको काम पछि धकेलिएसँगै लागत बढ्ने देखिएको आयोजनाले जनाएको छ।