काठमाडौं। पर्यटकीय नगरी पोखरामा व्यवस्थित बसपार्कको पर्खाइमा जनता रहेका छन् । चुनावको समयमा यहि स्थानमा आएर धेरैले अब यो वसपार्क व्यवस्थित हुन्छ भन्दै भाषण भने नगरेका हैनन् । यही बसपार्क बनाउछु भनेर वर्षौ देखि कति संसद देखि मंत्री सम्म भए तर यो बसपार्कको मुहार फेरीएको छैन । पोखरालाई पर्यटकीय नगर घोषणा गर्ने तयारीमा रहेको बताउदै पोखराका मेयर धनराज आचार्यले पोखराको बसपार्क व्यवस्थित बनाउछौ भनेर सार्वजनिक कार्यक्रममा घोषणा गरेका भएपनि हाल सम्म पनि यो बसपार्कको अवस्था उस्तै रहेको छ ।
पोखरा घुम्न आउने पर्यटकको संख्या वर्षौ बढ्दै गएको भएपनि अव्यवस्थित बसपार्काले गर्दा यहा आउने पर्यटक चिन्तित भएका छन् । पोखराको बसपार्क छिर्ने मुख्य सडक नै हिल्लाम्मे देखिन्छ । कुन रुटको बस कहा बाट लाग्छ र टिकट काउन्टर कहा छ भन्ने कुरा पत्ता लगाउन नै यात्रुलाई कठिनाई हुने गरेको छ । यहा भित्र व्यवस्थित शौचालय र प्रतिक्षालयको पनि कमी भएको देखिन्छ ।
बसपार्क भित्र सुरक्षा निकायको प्रहरी चौकी नहुदा यहा चोरी लुटपाट पनि हुने गरेको छ । पर्यटनको राजधानी घोषणा गर्नु अगाडी पोखराले अहिले एउटा राम्रो सुविधा सम्पन्न बसपार्क निर्माणको कार्यलाई प्राथमिकता दिनुपर्ने देखिन्छ ।
त्यस्तै केहि दिन अगाडी पोखरा महानगरपालिकाले पृथ्वीचोक स्थित बसपार्क भित्र रहेका एक दर्जन बढी मोटर पार्टस् र ग्यारेजहरू बन्द गरेको छ । महानगरपालिकाले यसअघि नै स्थानान्तरणका लागि समय दिइएको थियो । हाल बसपार्क व्यवस्थापनको काम तीव्र गतिमा भइरहेकाले बसपार्क कै जग्गामा सञ्चालित ती मोटर पार्टस् र ग्यारेजहरू बन्द गरिएको महानगरको यातायात व्यवस्थापन समितिका संयोजक एवं वडा नं.१६ का वडाध्यक्ष अमृत शर्मा तिमिल्सीनाले बताउनुभयो।
“महानगरपालिका पोखरा बसर्पाकको व्यवस्थित सञ्चालनका लागि प्रतिबद्ध छ, अहिले सडकबाट छुट्ने सबै गाडीहरूलाई बसपार्क भित्रबाटै छुट्ने.छुटाउने अनिवार्य व्यवस्था लागु गरिएको छ, संयोजक शर्माले भन्नुभयो, अहिले बसपार्कको आन्तरिक व्यवस्थापनको काम गरिरहेका छौँ, सोही अनुरूप बसपार्क कै जग्गा रहेका मोटर पार्टस् र ग्यारेजहरू बन्द गरेका हौँ ।” बसपार्क व्यवस्थापनको कार्यमा स्थानीय व्यवसायीहरूले सकारात्मक सहयोग गरिरहेको संयोजक शर्माले बताउनुभयो । उहाँका अनुसार बसपार्क भित्र रहेका कवाडी सङ्कलन केन्द्रहरूलाई भने २२ गते भित्र स्थानान्तरण गर्न निर्देशन दिइएको छ ।
पृथ्वीचोक बसपार्कलाई थप व्यवस्थित बनाउनका लागि रेलिङहरू निर्माण गरिएका छन् भने नाला निर्माण सम्पन्न गरी ढलान गर्ने तयारी गरिएको समितिका सदस्य एवं वडा नं.९ का वडा अध्यक्ष दीपेन्द्र मर्सानीले बताउनुभयो । उहाँका अनुसार बसपार्कको बिच भागमा रहेको टिकट काउन्टरहरू हटाइएको छ भने, केही टहराहरू समेत स्थानान्तरण गरिएका छन् ।
यस कार्यमा पोखरा महानगरपालिका, जिल्ला प्रशासन कार्यालय, यातायात व्यवस्थापन समिति, यातायात व्यवसायीहरू, नेपाल प्रहरी, नगर प्रहरी र स्थानीय जनप्रतिनिधिहरू निरन्तर लागिरहेका छन् । बसपार्क क्षेत्रमा भइरहेको अतिक्रमणलाई हटाई व्यवस्थित बसपार्क निर्माण गर्ने महानगरपालिकाको योजना रहेको महानगरपालिकाका प्रमुख धनराज आचार्यले बताउनुभएको छ ।
उहाँका अनुसार त्यस क्षेत्रमा रहेका भूमिहीन सुकुम्वासी, भूमिहीन दलित र अव्यवस्थित बसोबासीहरुलाई निस्सा वितरणको पहिलो चरणको कार्य सम्पन्न भैसकेको भने, अव दोस्रो चरणमा तिनीहरूको व्यवस्थापनको काम सुरु हुनेछ । त्यसपश्चात् बसपार्कमा थप पूर्वाधार निर्माणका कामहरू गरिनेछन् । समय नेपालबाट
