काठमाडौं। नेपाल विद्युत प्राधिकरणले भक्तपुर–ठिमी १३२ केभी भूमिगत डबल सर्किट प्रसारण लाइन निर्माण गर्ने भएको छ। प्राधिकरणले ३.२७ किलोमिटर लामो भुमिगत लाइन निर्माण गर्न लागेको हो।
प्रसारण लाइनको प्रारम्भिक वातावरणीय परिक्षण प्रतिवेदन तयारीको काम अन्तिम चरणमा पुगेको प्राधिकरणले जनाएको छ। प्राधिकरणाका अनुसार लाइन निर्माण गर्दा उक्त क्षेत्रको प्राकृतिक भौतिक, जैविक, सामाजिक, साँस्कृतिक र आर्थिक प्रणालीबीच पर्ने प्रभावको बारेमा स्थानीयसँग रायरसुझाव माग गरिएको छ।
लाइन निर्माण गर्दा विद्यालय, अस्पताल, स्वास्थ्य चौकी तथा सरोकारवाला व्यक्ति वा संस्थामा पर्नसक्ने असरबारे लिखित राय सुझाव माग गरिएको छ। इच्छुकले आगामी ७ दिनभित्र लिखित राय सुझाव उपलब्ध गराउन प्राधिकरणले अनुरोध गरेको छ।
लाइन निर्माण गर्दा भक्तपुर जिल्लाको भक्तपुर नगरपालिका वडा नम्बर १ र २, चाँगुनारायण नगरपालिकाको वडा नम्बर २ तथा मध्यपूर ठिमी नगरपालिकाको वडा नम्बर ५,६ र ९ प्रभावित हुनेछ।
प्रस्तावित प्रसारण लाइन देको मिवा इटापाके जग्गा एकीकरण आयोजना, कासँगकुसँग खोलाको किनारवाट पुरानो सडक हुँदै थिमी सवस्टेसनसम्मको विद्यमान सडकमा डिलिङ वा ओपन कट ट्रेन्च खनेर विद्युतको केवल जमिन मुनिवाट लगिनेछ।
प्राधिकरणका अनुसार सवस्टेसन र भूमिगत विद्युत मार्गका लागि कुनै पनि प्रकारको जग्गा अधिग्रहण हुने छैन।
