बेनी। म्याग्दीको अन्नपूर्ण गाउँपालिका–२ भुरुङ तातोपानीमा धवलागिरि क्षेत्रकै ठूलो होटल निर्माण हुन भएको छ। बेनीमा व्यवसाय गर्दै आएका राजु हमालले रु २५ करोड लगानीमा ५७ कोठा क्षमताको ‘होटल नेचुरल स्प्रिङ प्रालि’ सञ्चालनमा ल्याउन लागेका हुन्।
रोयल, डिलक्स र साधारण गरी तीन स्तरका सुविधासहितका कोठाको व्यवस्थासहित होटल निर्माण गरिरहेको उनले जानकारी दिए।
लगभग आठ रोपनी क्षेत्रफलमा छ तलाको भवन निर्माण भइरहेको छ। होटलको भौतिक पूर्वाधारतर्फको करिब ६५ प्रतिशत काम पूरा भएको र आगामी भदौदेखि औपचारिकरूपमा सञ्चालनमा ल्याउने तयारी गरिएको उनको भनाइ छ। होटलमा पार्किङ र लिफ्ट सुविधासँगै १५० जना क्षमताको सेमिनार हल, मसाज, क्याफे र लोकलमार्टसमेत सञ्चालनमा आउनेछन्।
होटल सञ्चालनमा आएसँगै पहिलो चरणमा ४० जनाले नियमित रोजगारी पाउने सञ्चालक हमालले जानकारी दिए।
पोखराबाट कुश्मा, बेनी हुँदै हिमालपारिको जिल्ला मुस्ताङ जाने एकमात्रै सडक बेनी–जोमसोम–कोरला सडकमा पर्ने भएकाले होटल सञ्चालनमा आउन सके यस सडकखण्ड हुँदै आवतजावत गर्ने आन्तरिक तथा बाह्य पर्यटकको बसाइ लम्बाउन टेवा पु¥याउने अपेक्षा गरिएको स्थानीय पर्यटन व्यवसायीसमेत रहेका अन्नपूर्ण गाउँपालिकाका कार्यपालिका सदस्य आत्मा तुलाचनले बताए।
तातोपानीमा अहिले ठूला सात र साना १५ गरी ४०० सम्म पर्यटक बस्न सक्ने क्षमताका होटल छन्। अन्नपूर्ण राउण्ड पदमार्ग र मुस्ताङ जाने एकमात्रै बेनी–जोमसोम सडकखण्डले समेटिएको ठाउँ भएकाले तातोपानीमा सञ्चालनमा आउन लागेको यस होटलले पर्यटकलाई आरामदायि बसोबासको प्रबन्ध मिलाउन र पर्यटन प्रवद्र्धनमा सघाउने स्थानीयवासीको भनाइ छ।
