खोटाङ। दिक्तेलको रत्नपार्कमा सबै धर्मावलम्बीलाई मान्य हुने संरचना निर्माण गर्न नेपाल आदिवासी जनजाति महासंघ जिल्ला समन्वय परिषद्ले माग गरेको छ।
दिक्तेल रुपाकोट मझुवागढी नगरपालिका–१ दिक्तेलको रत्नपार्कमा निर्माणाधीन सपिङ सेन्टर तथा चिल्ड्रेन पार्क नजिकैको सार्वजनिक जग्गामा हिन्दू धर्मलाई मात्र लक्षित गरेर मन्दिर निर्माण गर्न लागिएको भन्दै जनजाति महासंघले सबै धर्मावलम्बीलाई स्वीकार हुने संरचना निर्माण गर्न माग गरेको हो।
नगरपालिकाका प्रमुख प्रशासकीय अधिकृत निलमकुमार न्यौपानेलाई ज्ञापनपत्र बुझाउँदै जनजाति महासंघले सबै धर्मावलम्बीलाई मान्य हुने विकल्प खोज्न अनुरोध गरेको छ। परिषद्का जिल्ला अध्यक्ष फुर्वा शेर्पाले बुझाएको ज्ञापनपत्रमा एकल हिन्दू धर्ममा आधारित सोच बनाएर मन्दिर निर्माण सुरु गरिएकाप्रति दुःख प्रकट गरिएको छ।
आफ्नो मागलाई बेवास्ता गरे चरणबद्ध आन्दोलनका कार्यक्रम सार्वजनिक गरी पूर्णरूपमा संघर्षमा उत्रने चेतावनीसमेत दिइएको छ। प्रमुख जिल्ला अधिकारी फडिन्द्र दाहाललाई ज्ञापनपत्र बुझाउँदै महासंघले नेपाल सरकारको २५ माघ २०५८ को राजपत्र भाग–२ मा प्रकाशित र आदिवासी जनजाति उत्थान राष्ट्रिय प्रतिष्ठान ऐन २०५८ मा उल्लेख भएबमोजिम आदिवासी जनजातिका लागि सिफारिस दिने वा प्रमाणित गर्ने अधिकार आफूले पाउनुपर्ने दाबी गरेको हो।
नेपालमा बसोबास गर्दै आएका ५९ आदिवासी जनजातिमध्ये खोटाङमा राई, नेवार, मगर, तामाङ, शेर्पा, भुजेल, गुरुङ, सुनुवार, माझी, लिम्बू, चौधरी र थारू समुदायको बसोबास छ। यसअघिसम्म जिल्ला प्रशासन कार्यालयले आदिवासी जानजातिको प्रमाणीकरणको काम गर्दै आएकामा महासंघले उक्त प्रमाणीकरण गर्ने अधिकारमा जिल्ला प्रशासनलाई औपचारिकरूपमा ज्ञापनपत्र बुझाउँदै दाबी गरेको हो।
