काठमाडौं। नेपाल इन्जिनियर्स एसोसिएसनको निर्वाचनमा नेपाली कांग्रेस निकट सेन्टर फर डेमोक्रेटिक इन्जिनियर्स (सिडेन) को प्यानल नै विजयी भएको छ। एसोसिएसनको ३३ औं केन्द्रीय कार्यकारिणी समितिको निर्वाचनमा अध्यक्षसहित सबै उमेदवार विजयी भएका हुन्।
निर्वाचनमा कांग्रेसबाटै दुई प्यानलसहित ५ प्यानलबीच प्रतिस्पर्धा भएकोमा कांग्रेसको आधिकारिक प्यानल सिडेनका सबै उमेदवार निर्वाचित भएका हुन्।
अध्यक्षमा ३७३२ मतसहित गुल्मीका हरिबहादुर दर्लामी निर्वाचित भएका छन् । उनीसँग प्रतिस्पर्धामा नेकपा एमालेनिकट प्रोगेसिभ इन्जिनियरिङ एशोसिएसन नेपालबाट सुरज लामिछाने, नेकपा माओवादी केन्द्रनिकट नेपाल राष्ट्रिय इन्जिनियरिङ संगठन नेपाल, नेकपा एकीकृत समाजवादीनिकट इन्जिनियरिङ नेपाल सिन र जसपानिकट नेपाल इन्जिनियरिङ संघबाट संयुक्त रूपमा हरिराम पराजुली, नेपाल मजदुर किसान पार्टीनिकट इन्जिनियर समाज नेपालका राजेन्द्रप्रसाद हाडा रहेका थिए।
एसोसिएसनको उपाध्यक्षमा नारायणप्रसाद अधिकारी, महासचिवमा झा, उपमहासचिवमा सरोज धिताल, कोषाध्यक्षमा दिनेश त्रिपाठी, सहकोषाध्यक्षमा दीपक अधिकारी निर्वाचित भएका छन्।
केन्द्र र सातै प्रदेशमा एकैपटक चुनाव भएको थियो। एशोसिएसनमा अध्यक्ष, उपाध्यक्ष, महासचिव, उपमहासचिव, कोषाध्यक्ष, सहकोषाध्यक्ष, सदस्यहरू र परिषद सदस्यका लागि चुनाव भएको थियो।
