लायन्सले निर्माण गरेको गोरखाको श्री मनकामना माध्यमिक विद्यालयको भवन
काठमाडौं। लायन्स मल्टिपल डिष्ट्रिक्ट ३२५ नेपालले नेपालका विभिन्न जिल्लामा १८ वटा विद्यालयको भवन निर्माण गरी हस्तान्तरण गरेको छ। लायन्सले २०७२ सालको भूकम्पका कारण क्षतिग्रस्त बनेका १९ वटा सामुदायीक विद्यालय भवन निर्माण गरी समुदायलाई हस्तान्तरण गरेको हो।
लायन्सले ‘लायन्स क्लब अन्तराष्ट्रिय कोष’को ४८ करोड लागत सहयोगमा नेपाल सरकारबाट अनुमति लिएर विद्यालय भवन निर्माण गरेको लायन्स मल्टिपल डिष्ट्रिक्ट ३२५ नेपालका अध्यक्ष मनबहादुर रोकाले जानकारी दिए। उनले नेपालका म्याग्दी, कास्की, तनहुँ, गोरखा, काठमाडौं, भक्तपुर, काभ्रेपलाञ्चोक, रामेछाप, दोलखा लगायतका जिल्लामा ८ देखि १६ कोठासम्मका विद्यालय भवन निर्माण गरेको बताए। नेपाल सरकारबाट अनुमति लिनका लागि नै एक वर्ष लागेको भन्दै उनले तीन वर्षमा आयोजना पूरा भएको जानकारी दिए।
दोलखाको एक विद्यालयको भवन निर्माण सम्पन्न गरी गत बिहीबार समुदायमा हस्तान्तरण गरेसँगै लायन्सको विद्यालय भवन निर्माण आयोजना पूरा भएको अध्यक्ष रोकाले बताए। विद्यालय भवन निर्माण गरी समुदायमा हस्तान्तरण गरिसकेपछि संरक्षणको जिम्मा समुदाय अर्थात विद्यालयकै रहने भएपनि आवश्यक सहयोग भने लायन्सले आगामी दिनमा पनि गर्दै जाने उनको भनाइ छ।
‘ब्लड बैंक’ निर्माण
विभिन्न सामाजिक कार्यमा महत्वपूण योगदान दिँदै आएको लायन्स मल्टिपल डिष्ट्रिक्ट ३२५ नेपालले देशकै नमुना ‘ब्लड बैंक’ सञ्चालनको तयारी गर्दैछ। लायन्सले त्रिभुवन विश्वविद्यालयको प्राङ्गणमा ‘टियू लायन्स ब्लड ट्रान्सफ्यूजन एण्ड रिसर्ज सेन्टर’ निर्माण गर्दैछ। यसका लागि करिब ७ करोड लगानीमा भवन निर्माण कार्य भइसकेको अध्यक्ष रोकाले जानकारी दिए। भवनमा ११ करोड बराबरको आवश्यक उपकरण जडानको काम केही समयभित्रै सम्पन्न हुने र आगामी ६ महिनाभित्र ब्लड बैंक सञ्चालनमा आउने अध्यक्ष रोकाको दाबी छ।
नेपालको सन्दर्भमा कसैलाई रगत चाहिएमा उसको ग्रुप मात्र परीक्षण गरी रगत दिने गरिन्छ। निर्माणाधीन यस ब्लड बैंकमा भने बिरामीलाई कुन रगतको आवश्यकता भएको त्यो मात्र दिनेगरी एक पोका रगतलाई रातो, सेतो, सेलहरु गरी चार भागमा छुट्याएर बिरामीलाई आवश्यक पर्ने रगत मात्र दिने व्यवस्था हुने बताइएको छ।
लायन्स क्लबका सदस्यहरुको सदस्यताका लागि जम्मा भएको रकमबाट करिब १६ करोड लागत खर्च अनुमानमा ब्लड बैंक निर्माण हुँदैछ। यसमा लायन्स क्लबले सम्पूण खर्च बेहोरेको छ भने त्रिविको जग्गा प्रयोग भएको हुँदा यो ब्लड बैंक लायन्स र त्रिविको जोइन्ट भेञ्चरमा निर्माण भइरहेको हो।
सामाजिक कार्यका लागि सक्रिय लायन्स क्लबले विगतमा पनि धेरै सामाजिक कार्यमा योगदान पुर्याइसकेको छ। यस अघि अन्धोपना निवारणका लागि विभिन्न कार्यक्रमहरुको आयोजना गरिसकेको लायन्सले चाँडै नै डाइबिटिज निवारणका लागि पनि कार्यक्रमहरुको आयोजना गर्ने अध्यक्ष रोकाले जानकारी दिए।
लायन्स क्लबले यसअघि देशभरका आँखा अस्पतालहरुको स्तरवृद्धिका लागि पनि सहयोग गरेको जनाएको छ। आँखा अस्पतालहरुमा उपकरण जडानका लागि सहयोग गरेको लायन्सले धेरै बच्चाहरुको आँखाको उपचार गर्नमा पनि मद्दत पुर्याएको छ।
