काठमाडौं। गण्डकी प्रदेशका मुख्यमन्त्री कृष्णचन्द्र नेपाली पोखरेलले अधुरा रहेका खानेपानी योजना सम्पन्न गराउन आगामी आर्थिक वर्षमा पर्याप्त बजेट विनियोजन गर्ने बताएका छन। दमौली खानेपानी तथा सरसफाइ उपभोक्ता संस्थाको हिजो आयोजित ११औँ साधारणसभाको उद्घाटन गर्दै मुख्यमन्त्री पोखरेलले हरेक नागरिकलाई आधारभूत खानेपानी सुविधा पुर्याउन सरकार प्रतिबद्ध रहेको बताएका हुन्।
“अझै पनि धेरै गाउँमा खानेपानीको सुविधा पुगेको छैन्”, उनले भने , “दुई वर्ष कोरोना सङ्क्रमणका कारण खानेपानी योजना सम्पन्न हुन सकेनन्, त्यस्ता योजना सम्पन्न गर्नका लागि सरकार गम्भीर छ।” मुख्यमन्त्री पोख्रेलले दुई वर्षभित्र प्रदेशवासीलाई आधारभूत खानेपानी सुविधा पुर्याउने नीति लिइएको उल्लेख गरेका छन।
उनले कुवाको पानी उपभोग गर्न बाध्य जनतालाई आगामी वर्षभित्र आधारभूत खानेपानी उपलब्ध गराउने प्रतिबद्धता व्यक्त गरेका छन। आफू नेतृत्वको सरकारले पाँच हजार घरमा खानेपानी सुविधा पुर्याइसके पनि त्यो पर्याप्त नरहेको उल्लेख गर्दै उनले सरकार परिवर्तन भए पनि खानेपानी र उज्यालो प्रदेशका कार्यक्रमलाई निरन्तरता दिइएको जानकारी दिए।
मुख्यमन्त्री पोखरेलले स्वच्छ खानेपानी सुविधा पुर्याउन सकिए स्वास्थ्यतर्फको लगानी घट्ने उल्लेख गर्दै खानेपानीका कारण ८० प्रतिशतभन्दा बढी रोग लाग्ने तथ्याङ्कले देखाएको बताए। उनले एक घरः एक धारा सरकारको प्राथमिकतामा रहेको पनि बताए।
आन्तरिक मामिलामन्त्री डोवाटे विकले आगामी वर्षको बजेटमा अधुरा खानेपानी सम्पन्न गराउने गरी पर्याप्त बजेट विनियोजन गरिने बताए। जलस्रोत तथा ऊर्जामन्त्री हरिशरण आचार्यले सबै नागरिकलाई खानेपानी सुविधा पुर्याउनु सरकारको कर्तव्य रहेको उल्लेख गर्दै खानेपानी र सिँचाइमा विद्युत् महसुल निःशुल्क गराउने तर्फ सरकार अगाडि बढेको बताए।
दमौली खानेपानी तथा सरसफाइ उपभोक्ता संस्थाका अध्यक्ष वृषराज श्रेष्ठले बजार क्षेत्रमा वितरण गरिएको पानी अझै पनि पर्याप्त नभएकाले खानेपानी योजना विस्तारको योजना बनाइएको बताए। उनले खानेपानीलाई विद्युत् महसुल शुल्कमा छुट दिन सरकारसमक्ष आग्रह गरेका छन।
