काठमाडौं। यतिबेला सबैलाई चुनावी माहोलको प्रचारप्रसारको काममा खट्नलाई निकै चटारो छ तर, काभ्रेपलाञ्चोकको कोसीपारिस्थित भुम्लु गाउँपालिका –६ कोलातीका बासिन्दालाई भने कसरी खानेपानीको जोहो गर्ने भन्ने चटारो छ। बिहान जो पहिला धारामा पुग्यो उसैले धेरै पानी ल्याउन पाउने भएकाले यहाँका बासिन्दा खानेपानीको जोहो गर्ने चटारोमा रहेका छन्।
बिहान उठ्ने वित्तिकै खानेपानी जोहो गर्नका लागि धारामा गाग्री बोकेर जानु यहाँका बासिन्दाको पहिलो दायित्व हो। सिङ्गो गाउँ नै पानीविहीन भएका कारण गाउँदेखि तलको खोल्सामा रहेको धारामा गएर पानी बोकेर ल्याई जीवन गुजारा गर्नुपर्ने यहाँका बासिन्दाको बाध्यता रहेको छ।
वर्षौदेखि खानेपानीको चरम अभाव झेल्दै आएका यहाँका बासिन्दाले अहिले पनि त्यही समस्या झेलिरहेका छन्। वर्षौंदेखि दिनको दुई गाग्री खानेपानीको भरमा जीवन गुजार्नु परेको स्थानीय बासिन्दा बताउँछन्। “हामीले दिनको दुई गाग्री पानी बोकेर ल्याएर जीवन चलाउनुपरेको छ”,उनिहरुले भने,“पूर्खादेखिको त्यही एउटा धारामा पानी थापेर ल्याउनु पर्छ, त्यो पनि पालो कुरेर। कोलातीमा विकास गर्छु, पानी ल्याउँछु भनेर नेताले भन्दै आएको धेरै वर्ष भयो तर अहिलेसम्म हामीले त्यही एउटा खानेपानीसम्म पाउन सकेका छैनौँ।”
पूर्खादेखि पानी खाइरहेको धारामा पनि भूकम्पदेखि मूल दबिएर पहिलाको भन्दा सानो गरी पानी आएकोले झन् समस्या थपेको स्थानीय बासिन्दाको भनाइ छ। बस्तुभाउलाई ख्याउन, नुहाउन र लुगा धुनका लागि त झन अझै तलसम्म गएर गाग्रीमा ओसार्नुपर्ने बाध्यता रहेको उनीहरु बताउँछन्। वर्षमा एक बाली मकै बाहेक केही पनि खेती नहुने कोलातीमा जीवन गुजार्न समेत गाह्रो हुने स्थानीय बासिन्दा बताउँछन्।
खानेपानी र सिँचाइको पर्याप्त सुविधा भयो भने दश नङ्ग्रा खियाएर आफ्नै जग्गा कोट्याएर यही सबै चिज फलाउन सक्ने स्थानीय बासिन्दा बताउँछन्। “न विदेश जानुपर्छ न कतै, पानीको अभावले मात्रै यहाँका बासिन्दाको जीवनमा केही परिवर्तन भएको छैन”, स्थानीय बासिन्दा बताउँछन्। सो वडाका वडाध्यक्ष भरतबहादुर शिवभक्तिले भने खानेपानी समस्या झेल्दै आएका वडा बासिन्दाको लागि खानेपानीको काम तीव्र गतिमा अगाडि बढिरहेको बताए। “खानेपानीको चरम समस्या रहेको बासिन्दाको लागि खहरे खोला वृहत लिफ्टिङ खानेपानी आयोजनाको काम तीव्र रुपमा भइरहेको छ”, उनले भने, “अहिले निर्वाचनको समय भएको कारण निर्माण व्यवसायीले समय दिन नभ्याएको कारण अलि ढिलाइ भइरहेको छ।” उनका अनुसार सो आयोजनाबाट सो वडाका करिब चार सय घरधुरीलाई सेवा दिनेगरी काम भइरहेको छ।
