काठमाडौं। सडक यातायात सबैको पहुँचमा छ, तर यसको गुणस्तरमा भने ध्यान नपुगेको देख्न सकिन्छ। ट्राफिक प्रहरीको तथ्याङ्क हेर्ने हो भने हरेक वर्ष सडक दुर्घटना बढिरहेको देख्न सक्छौं। गत आव २०७७/०७८ मा ९ हजार ५ सय ४५ वटा सवारी दुर्घटनाको भएको तथ्याङ्क ट्राफिक प्रहरीसँग छ। यो संख्या भनेको ट्राफिक प्रहरी कार्यालयमा दर्ता भएका रेकर्ड हुन्, यहाँ रेकर्ड नभएका घटनाको लेखाजोखा नै छैन। हरेक दिन सवारी दुर्घटनाका समाचार सञ्चारमाध्यममा नहेरेको दिन नै हुँदैन। सडक दुर्घटना बढ्दै मात्र जाने हो भने सडक यात्रा भरपर्दो देखिँदैन। यात्रा अवधिभर डरैडरमा यात्रा गर्नुपर्ने बाध्यता मात्र थपिँदै जान्छ।
राजमार्गका यात्रामा भने गन्तव्यमा नपुगुन्जेलसम्मको यात्रा कहालीलाग्दो देखिन्छ। पहाडी भूभाग डाँडाकाँडा छेडेर सडकमार्ग सञ्चालन गरिएको छ, त्यसमाथि साँघुरो र घुमाउरो सडक हुनाले पनि दुर्घटना बढिरहेको छ। त्यस्तै सडकमा झन् चालकले लापरवाही र हेलचेक्र्याइँ गरी सवारी चलाउनाले पनि दुर्घटना बढ्ने गरेको छ। त्यसकारण आम सवारी प्रयोगकर्तालाई सडकप्रतिको विश्वास घट्दै गएको देख्न सकिन्छ।
यस सम्बन्धमा ट्राफिक प्रहरी, सवारी चालक, सम्बन्धित सरोकारवालाले समयमा नै ध्यान नपु(याउने हो भने यस्ता दुर्घटनाबाट नागरिकले सधैं कष्ट भोग्नुपर्ने बाध्यता आउँछ। यस्ता घटनालाई समयमा नै निराकरणका निमित्त पहल नगर्ने हो भने आमनागरिकको सडक प्रयोगमा कमी आउन सक्ने देखिन्छ। बरु मानिसमा महँगै भाडा तिर्नुपर्ने बाध्यता भए पनि सम्भव भएका स्थानमा आवतजावतका लागि हवाईमार्गको प्रयोग गर्न इच्छुक हुन सक्ने अवस्था सिर्जना नहोला भन्न सकिन्न।
यहाँ अनाहकमा सवारी दुर्घटनाबाट पिल्सिएका धेरै छन्। आफूले सही तरिकाले सडक सवारी सुरक्षा मापदण्ड अपनाउँदाअपनाउँदै पनि अन्य सवारीको आतंक देख्दा उदेक लाग्छ। राजमार्गमा ठूला सवारी आतंक दिनप्रतिदिन बढ्दै गइरहेको छ। साना सवारी चालकले आफू सुरक्षित तवरले सवारी चलाइरहँदा पनि ठूला सवारीको आतंकले गर्दा अनाहकमा ज्यान जाने दुर्घटना निम्तिने गरेको छ भने अंगभंग भई शारीरिक रूपमा अशक्त हुनुपरेको छ। राजमार्गमा तीव्र गतिमा सवारी चालकले सवारी चलाउँदा दुर्घटना झन् झन् बढ्दै गइरहेको छ। साँघुरा सडक त्यसमाथि पहाडका घुम्ती नै घुम्तीमा चालक सचेत नहुनाले दुर्घटना भइरहेको अनुमान लगाउन गाह्रो पर्दैन।
दिन–प्रतिदिन दुर्घटनाका समाचार बन्नुपर्दा र सुन्नुपर्दा उदेक लाग्छ। आम मानिसमा चेतनाको अभिवृद्धि किन हुन सकेन सरकार यस्ता विषयमा किन मौन जस्तै बनिरहन्छ अब राजमार्गमा हुने सडक दुर्घटनाको विषयमा संयमित हुनुपर्ने आवश्यकता देखिन्छ। त्यसैले यस्ता दुर्घटना न्यूनीकरण गर्न चालकलाई सचेतनात्मक कार्यक्रम सञ्चालन गर्नुपर्ने आवश्यकता छ भने गति नियन्त्रणमा ध्यान पु(याउनुपर्ने, त्यस्तै क्षमताभन्दा दोब्बर यात्रु चढाउन रोक लगाउनुपर्ने देखिन्छ। चालकलाई यात्रा अवधि तोक्ने व्यवस्थाको खाँचो छ। डबल सवारी चालक राख्नुपर्ने कार्यक्रम ट्राफिक प्रहरीले चलाइरहे पनि प्रभावकारिता भने देखिएको छैन। यस्ता नियम–कानुनको प्रयोग नहुँदा सवारी दुर्घटनामा सोझासाझा नागरिकले अनाहकमा दुःख भोग्नुपरिरहेको देखिन्छ।
कारोबार दैनिकबाट
