काठमाडौं। बागलुङको बडिगाड गाउँपालिका वडा नम्बर ७ का विशाल घर्ती मगर वैशाखदेखि मुस्ताङ थासाङको लेकमा बस्दै आएका छन्।
उनी वैशाखको पहिलो सातादेखि मुस्ताङको थासाङ वडा नम्बर २ को सानुसरे क्षेत्रका खर्कमा बस्दै आएका थिए। उनी यार्सागुम्बा संकलन गर्न त्यस क्षेत्रमा पुगेका हुन्। आइतबार पनि उनीसहित साथीहरू यार्सागुम्बा खोजीमै थिए।
‘टाउको माथिबाटै जहाज गएजस्तो भयो। एकैछिनमा ठूलो आवाज आयो। जहाज ठोक्कियो कि क्या हो भनेर साथीहरूबीच कुरा भयो,’विशालले भने, ‘बादल लागेको थियो, डाँडाहरू केही देखिएको थिएन।’
केही घन्टापछि गाउँलेहरूले टेलिफोन गरेर तारा एयरको जहाज हराइरहेको खबर दिएको उनले बताए। ‘हामीले आइतबार बेलुकीसम्मै जहाज भेटिन्छ कि भनेर खोज्यौं, भेटिएन,’ उनले भने। हिजो बिहान ५ बजेदेखि पुनः जहाजको खोजी सुरू गरिएको विशाल बताउँछन्।
‘हामी त्रिपाल टागेर यही खर्कहरूमा बसेका छौं। हिजो बिहान ५ बजे उठेर चिया मात्रै खाएर जहाजको खोजी गर्न निस्कियौं,’ उनले भने, ‘एक घन्टाजति हिडेपछि माथि डाँडामा पुग्यौं। हामी तीन जना छौं। दुई जना डाँडाबाट अझै माथि जानुभयो म तलतर्फ हेर्न लागेँ। केही तल पुगेपछि डिजेल गन्हायो। यतै दुर्घटना भएको हो कि भनेर खोज्दा जहाजका टुक्राहरू देखेँ। शवका टुक्रा छरिएका अवस्थामा देखेँ।’
यसपछि आफूले गाउँमा भएका भिनाजुलाई टेलिफोन सम्पर्क गरी जहाज दुर्घटनाबारे जानकारी दिएको उनले बताए। ‘भेनालाई जहाज दुर्घटनाबारे खबर गरेको थिएँ। उहाँले प्रहरी चौकीमा खबर गरिदिनुभएछ। केहीबेरमा प्रहरीहरूले मलाई फोन गरेर दुर्घटनाग्रस्त जहाजको फोटो र भिडिओ पठाउन भनेपछि मैले पठाइदिएको हुँ,’ उनले भने।
उनकाअनुसार जहाज डाँडामा एकपटक ठक्कर खाएर पुनः ठक्कर खाएको जस्तो देखिन्छ। ‘घटनास्थलमा कोही पनि घाइते देखिएन। कसैलाई जीवित देखिएन,’ उनले भने, ‘शव पनि सग्ला छैनन्। जहाज पनि टुक्राटुक्रा भएको छ।’
मुस्ताङका प्रमुख जिल्ला अधिकारी नेत्रप्रसाद शर्माले पनि विशालले नै घटनास्थलको तस्बिर पठाएको बताए। आइतबार बिहान ९ः५५ मा पोखराबाट उडेको जहाज १०ः१५ मा मुस्ताङको जोमसोम विमानस्थलमा अवतरण गर्नुपर्ने थियो। तर १०ः०७ बजेदेखि जहाज सम्पर्कविहीन थियो।
तारा एयरको ९ एन एइटी जहाज मुस्ताङको आकाशमा पुगिसकेपछि १० बजेर ७ मिनेटमा अन्तिम पटक जोमसोम विमानस्थलको टावरसँग सम्पर्कमा आएको थियो। जहाज क्याप्टेन प्रभाकर घिमिरेले उडाएका थिए। जहाजमा चालक दलका दुई जना अन्य सदस्य र १९ यात्रु थिए। जहाजमा २ जना जर्मन, चार जना भारतीय र १३ नेपाली यात्रु थिए।
सेतोपाटी बाट
