काठमाडौं। म्याग्दीमा एक वर्षको अवधिमा १९ किलोमिटर सडक कालोपत्र भएको छ। चालु आर्थिक वर्षमा बेनी जोमसोम कोरला सडक आयोजना, पूर्वाधार विकास कार्यालय म्याग्दी र सघन सहरी विकास डिभिजन कार्यालय बागलुङले गरेर जिल्ला भित्रका विभिन्न स्थानहरुमा १९ किलोमिटर छ सय ७० मिटर सडक कालोपत्र गरिएको हो।
बेनी–जोमसोम कोरला सडक आयोजनाले गलेश्वर देखि रघुगंगा गाउँपालिका १ बेगखोला सम्म विभिन्न स्थानमा गरेर यसवर्ष ५ किलोमिटर सडक कालोपत्र गरेको आयोजनाले बताएको छ। यसैगरी पूर्वाधार विकास कार्यालय म्याग्दीले जिल्ला भित्र सञ्चालित योजना मार्फत १३ किलोमिटर ८ सय ७० मिटर र सघन सहकारी विकास डिभिजन कार्यालय बागलुङ मार्फत एककिलो मिटर आठसय मिटर सडक कालोपत्र गरिएको छ।
बेनी –बागलुङ सडक अन्तर्गत बेनी नगरपालिका २ खबर देखि हाँडेभिर स्थित बेलीब्रीज पुलको मुखसम्म एक किलोमिटर दुईसय मिटर सडक कालोपत्र गरिएको छ। यो सडक कालोपत्र गर्न बिरुवा–सिमरन जेभीले वि.स २०७७ साउनमा कर सहित पाँच करोड ४३ लाख रुपियाँमा ठेक्का सम्झौता गरेको थियो।
कोरोनाका कारण केही महिना ढिला भएपनि थपिएको म्याद भित्र निर्माण व्यवसायीले सडक कालोपत्र गर्ने योजना सम्पन्न गरेको पूर्वाधार विकास कार्यालय म्याग्दीले बताएको छ। कच्ची,साँघुरो र ग्रेड तथा घुम्ती नमिलेको सडकलाई फराकिलो बनाई सात मिटरका दरले डिबिएसडी प्रविधिको कालोपत्र गरिएको छ।
पूर्वाधार विकास कार्यालय म्याग्दीले जिल्लाका तिन गाउँपालिका मंगला,मालिका र धवलागिरिलाई सदरमुकामसँग जोड्ने जिल्लाको रणनीतिक महत्वको बेनी दरबाङ सडक अन्तर्गत पहिलो चरणमा बेनी देखि मंगला गाउँपालिका २ सिमसम्म १२ किलोमिटर पाँचसय ८५ मिटर दुरीको सडक कालोपत्र गरेको छ।
लामा समानान्तर निर्माण कम्पनीसँग ४७ करोड ८७ लाख ९३ हजार रुपियाँमा ठेक्का सम्झौता गरि निर्माण गरिएको हो। योजना अन्तर्गत सडक विस्तार गरेर फराकिलो,नाली र पर्खाल निर्माण गरी ११ मिटर फराकिलो सडकमा ७ मिटर चौढाईका दरले डिबिएसटी प्रविधिको कालोपत्र कार्य असारको तेस्रो हप्तामा सम्पन्न भएको पूर्वाधार कार्यालय म्याग्दीले जनाएको छ।
सघन सहरी विकास डिभिजन कार्यालय बागलुङ मार्फत ठेक्का लगाएर बेनी नगरपालिका ७ मंगलाघाट देखि बेनी नगरपालिका २ बगरफाँटको कोटखोला सम्म गरेर एक किलोमिटर आठसय मिटर सडक कालोपत्र भएको छ। देब एण्ड सायर बिएन त्रिशक्ति जेभीले ५ करोड रुपियाँ लागतमा उक्त सडक कालोपत्र गरेको हो।
यस्तै मंगला गाउँपालिकाको सिम देखि लाम्पाटा सम्मको साढे दुई किलोमिटर सडक स्तरोन्नती सहित कालोपत्र गर्न ओमबुद्ध निर्माण सेवा सँग गत पुस १८ गते १० करोड ७० लाख २१ हजार रुपियाँमा ठेक्का सम्झौता भएको छ। १८ महिना भित्र सक्ने गरी सम्झौता भएको कार्यालयले जनाएको छ। सडकलाई आठ मिटर फराकिलो बनाएर सात मिटर चौढाईमा कालोपत्र,नाली र पर्खाल निर्माण गरिने कार्यालयले जनाएको छ। निर्माण व्यसायीले यतिखेर सडक स्तरोन्नतीको काम थालेको कार्यालयले जनाएको छ।
यसैगरी बेनी नगरपालिकाले बेनी बजार क्षेत्रमा कालोपत्र गरिएको ६ सय मिटर सडकलाई मर्मत सम्भार गर्नुका साथै एक किलोमिर दुईसय मिटर सडक ढलान गरिएको छ।
