पर्सा। वीरगञ्ज–ठोरी हुलाकी सडकखण्ड अन्तर्गत ठोरी गाउँपालिका–२ र ३ जोड्ने ठुटेखोला पुलको पूर्वतर्फको एप्रोच सडक सञ्चालनमा आएको छ । पुल बनेको ४ वर्षपछि गाउँपालिकाले बनाएको एप्रोच सडक सञ्चालनमा आएको हो।
यसअघि ठुटे खोलाबाट भारतीय पक्षले प्रयोग गर्दै आएको दुईवटा कुलो मध्ये पश्चिमतर्फको एउटा कुलो पुरेर स्थानीयले डाइभर्सन बनाई पुलको प्रयोग गर्दै आएका थिए । हुलाकी सडक योजना कार्यालयले पुनः टेण्डर आह्वान गरेपछि मात्र एप्रोच सडक कालोपत्रेको काम हुने जनाइएको छ ।
ठोरी गाउँपालिकाका अध्यक्ष लालबहादुर श्रेष्ठ, उपाध्यक्ष गोकुली कुमारी रेग्मी समेतको उपस्थितिमा पालिकाको स्काभेटर प्रयोग गरी एप्रोच सडक सञ्चालनमा ल्याइएको थियो । सडक सन्चालन नभएका कारण ठोरीका बासिन्दा तथा ठोरी घुम्न आउने पर्यटकहरुले सास्ती व्यहोर्दै आएका थिए ।
हुलाकी सडकको उक्त खण्ड निर्माणको जिम्मा पाएको कालिका बानियाँ जेभीले विवादका कारण एप्रोच सडक बनाउन सकेको थिएन । भारतीय पक्षले ठूटे खोलाबाट कुलो बनाएर सिंचाइका लागि पानी लैजाने गरेका छन् । कुलो पुरेर बाटो बनाउनुपर्ने भएपछि उनीहरुले पटक–पटक अवरोध गरेका थिए ।
गाउँपालिका अध्यक्ष श्रेष्ठले भारततर्फका स्थानीय मुखियाहरुसँग निरन्तर सम्पर्क, सहकार्य र समन्वय गरी सडक सञ्चालनमा ल्याइएको बताए ।
बिहार धमौरा पञ्चायतका मुखिया श्याम बिहारीले आफूहरुलाई पानीसँग मात्र सरोकार रहेकाले नेपाली पक्षले पर्याप्त पानी जाने वातावरण बनाइदिएर सडक बनाउँदा कुनै आपत्ती नरहेको बताए ।
पुलसम्म जाने एप्रोच सडक नबन्दा डाइभर्सनको बाटो प्रयोग गर्नुपर्ने बाध्यता थियो । घुमाउरो डाइभर्सनमा पर्ने साना काठे अस्थायी पुलमा सवारी साधन सञ्चालन गर्न समेत कठिनाइ हुँदै आएको थियो ।
