काठमाडौं। काठमाडौं महानगरपालिकाले विभिन्न संस्थालाई कर बुझाउन १० दिने अल्टिमेटम दिएको छ। महानगरपालिकाको राजस्व विभागले मंगलबार १७ वटा संस्थालाई १० दिन भित्र कर बुझाउन पत्रचार गरेको हो।
सम्पत्ति कर नबुझाएको भन्दै महानगरले पटकरपटक ताकेता गर्दा पनि कर नबुझाएपछि अल्टिमेटमसहितको पत्र पठाएको राजस्व विभागका प्रमुख शिवराज अधिकारीले बताए।
महानगरले खाद्य संस्थान, थापाथली, हाइट फिल स्कूल–नयाँबजार, रञ्जना ट्रेड सेन्टर– न्युरोड, साझा भण्डार–भोटाहिटी, राष्ट्रिय नाचघर–जमल, चेम्बर अफ कमर्स–जमल, कर्मचारी सञ्चय कोष–ठमेल, नेपाल विद्युत प्राधिकरण– रत्नपार्क र नेसनल ट्रेडिङ लिमिटेड–सिंहदरबारलाई पत्र लेखेको हो।
यस्तै, महानगरले नेपाली जामे मस्जिद–बागबजार, कृषि सामग्री संस्थान–टेकु, मनमोहन मेमोरियल कलेज एण्ड शिक्षण अस्पताल–स्वयम्भू, आरबि कम्प्लेक्स–न्युरोड, काठमाडौं प्लाजा–पुतलीसडक, नेपाल सेयर मार्केट–पुतलीसडक, सिविक हस्पिटल प्रा.लि र डेन्टल कलेज–सामाखुसीलाई पनि पत्र लेखेको छ।
यी संस्थाले कर नबुझाए महानगरपालिकाको राजस्व ऐन, २०७५ बमोजिम कारबाही गरी कर असुल गरिने जनाएको छ।
